Марде, ки ду сол боз шабро дар мошин рӯз мекунад
Шералӣ Салимов, марди 55-солае дар Душанбе давоми ду сол мешавад, ки шабро дар мошинаш рӯз мекунад. Дар қисми пуштии автомашинаи тамғаи ГАЗ-2410, ки ба қавли худи ӯ "иҷора" гирифтааст, кӯрпача ва болишт мондааст ва шабонгаҳ ҷои хобаш ҳамон ҷост. Шералӣ мегӯяд, ин кори ӯ аз маҷбурист. Ба қавли ӯ, модар ва бародаронаш хонаи падариашро аз дасташ гирифтаанд ва ӯ бе ҷову макон мондааст. Шералӣ мегӯяд, "ман пуле надорам, ки хона иҷора гирам. Даромадам танҳо ба хӯрокам басандагӣ мекунад. Ягон мақомот ба додам намерасад. Даъвоҳои судиро ба нафъи модарам ҳал мекунанд. Ман дигар чора надорам."